Inissianik attartorneq pillugu Inatsisartut peqqussutaata allanngortinneqarneranik Inatsisartut peqqussutissaattut siunnersuut

 

pillugu

 

Inatsisartut Attaveqarnermut Pilersuinermullu aamma Ineqarnermut Ataatsimiititaliaata

 

ISUMALIUTISSIISSUTAA

 

Siunnersuutip aappassaaneerneqarnerani saqqummiunneqartoq

 

Inatsisartut Attaveqarnermut Pilersuinermullu aamma Ineqarnermut Ataatsimiititaliaat suliarinninnermini ukuninnga inuttaqarpoq:

 

Inatsisartuni ilaasortaq Lars Sørensen, IA, siulittaasoq
Inatsisartuni ilaasortaq Per Rosing-Petersen, Siumut
Inatsisartuni ilaasortaq Peter Grønvold Samuelsen, sinniisussaq, Siumut
Inatsisartuni ilaasortaq Godmand Rasmussen, Atassut
Inatsisartuni ilaasortaq Mogens Kleist, Kattusseqatigiit

 

UKA 2001-imi siullermeerinerup kingorna Inatsisartut Attaveqarnermut Pilersuinermullu aamma Ineqarnermut Ataatsimiititaliaata siunnersuut nassuiaatitai ilanngullugit misissorpaa.

 

Tusarniaaneq

Siunnersuut tusarniaassutigineqarsimanngilaq, tamannalu ataatsimiititaliamit isorinartoqartinneqarpoq. Taamaattumik aalajangersagaq nutaaq tunngavigalugu nalunaarusiortoqarpat, nalunaarutit atortuulersinneqannginneranni kommuninut, Namminersornerullit Oqartussanut, INI A/S-imut aamma ineqartut peqatigiiffiinut tusarniaassutigineqarnissaat ataatsimiititaliamit kaammattuutigineqassaaq.

 

Siunnersuutip imarisai

Namminersornerullutik Oqartussat kommuunillu inissiaataasa attartortittakkat aqunneqarnissaat ingerlanneqarnissaallu pillugit erseqqinnerusumik malittarisassiornissamut Naalakkersuisut piginnaatinneqarput, tassunga ilanngullugit aqutsinermut akileeqataassutsip immikkoortiterneqarnissaa aamma akileeqataassutinut akiliutinullu avinneqarnissaa, aningaasaatit aquuneqarnissaat, aningaasatigut siumut missingersuusiortarnissaq, naatsorsuutinik saqqummiussisarnissaq kukkunersiuisarnissarlu.

Piginnaatitsissuteqarnikkut ineqarfiit immikkoortortaqarfiisa akiviit tunngavigalugit namminneq missingersuusiorsinnaanissaannik qulakkeerinnittunik malittarisassiorsinnaanissaq periarfissinneqarpoq. Missingersuutit taamaattut ineqarnermut tapiissutit pillugit aaqqissuussinermut nutaamut atugassanik ineqarnermut akiliutit pillugit paasissutissanik tutsuiginartunik suliaqarnissami tunngaviliisuussapput. Aammattaaq ineqarfiit immikkoortortaqarfiisa naatsorsuutaasa naammattumik kukkunersiuiffigineqartarnissaat siunnersuutikkut qulakkeerneqassaaq.

Inissiat nunatsinni sumiikkaluarpataluunniit missingersuusiornermut naatsorsuutinillu tunniussisarnermut ersarissumik assigiissaakkamillu periuseqarnissaq ataatsimiititaliamit pingaartutut isigineqarpoq.

Taamaattumik ataatsimiititaliami amerlanerussuteqartut, tassaasut Siumup, IA-p aamma Atassutip ilaasortaatitaasa, inissianik attartorneq pillugu Inatsisartut peqqussutaata allanngortinneqarneranik Inatsisartut peqqussutissaattut siunnersuutip akuersissutigineqarnissaa inassutigaat.

Ikinnerussuteqartup, tassaasup Kattusseqatigiit ilaasortaatitaata, oqaatigaa inissianut tunngasumik nutarterinerup aningaasatigut kingunerisassai akuersaarneqarsinnaanngitsut, taamaattumillu siunnersuutip itigartitsissutigineqarnissa inassutigalugu.

Taama oqaaseqarluni Inatsisartut Attaveqarnermut Pilersuinermullu aamma Ineqarnermut Ataatsimiititaliaata siunnersuut aappassaaniigassanngortippaa.

 

	Lars Sørensen, Formand
Per Rosing-Petersen		Godman Rasmussen
Peter Grønvold Samuelsen sinniisussaqt		Mogens Kleist